काठमाडौँ, २५ कात्तिकः दक्षिण कोरियामा रहेका स्याङ्जाको कालीगण्डकी गाउँपालिका–४ बिर्घाका २३ युवाले मातृभूमि सामुदायिक पुस्तकालयको सञ्चालन तथा संस्थागत विकासका लागि रु दुई लाख १२ हजार ६४० आर्थिक सहयोग गरेका छन् ।
तिहारको अवसरमा बिर्घामा आयोजित एक कार्यक्रमबीच सो रकम पुस्तकालयलाई हस्तान्तरण गरिएको हो । सो कार्यक्रममा सहयोगदाताका परिवारका सदस्यलाई सम्मान गरिएको पुस्तकालयका अध्यक्ष राजेन्द्रप्रसाद पाण्डेले जानकारी दिनुभयो ।
उहाँले विदेशमा रहेर पनि आफ्नो माटो, गाउँ, समाज र पुर्खाले स्थापना गरेको संस्थाप्रति युवाले देखाएको आत्मीयता र जिम्मेवारीले अनुशरणीय रहेको बताउनुभयो ।
विसं २०४६ सालमा स्थापित मातृभूमि सामुदायिक पुस्तकालय शैक्षिक, बौद्धिक तथा सामाजिक गतिविधिको महत्त्वपूर्ण केन्द्रका रूपमा परिचित छ । पुस्तकालयमा बालबालिका, युवा, महिला तथा सूचना प्रविधिलगायत विभिन्न विधाका अध्ययन सामग्री र सेवा उपलब्ध छन् ।