उदयपुर, २७ असोजः उदयपुरको चौदण्डीगढी नगरपालिकाले नगरभित्रका सदा समुदायलाई दसैँ खर्च उपलब्ध गराएको छ ।
दसैँजस्ता ठूला चाडपर्वमा आर्थिक अभावका कारण खुसी साट्न समेत कठिन हुने अति विपन्न सदा ( मुसहर) समुदायलाई प्रतिपरिवार रु तीन हजारका दरले दसैँ खर्च उपलब्ध गराएको हो । नगरपालिकाले स्थानीय सामाजिक सुरक्षा कार्यक्रमअन्तर्गत नगरभित्र स्थायी बसोबास गर्ने २२८ मुसहर परिवारलाई दसैँ खर्च उपलब्ध गराएको हो ।
नगरपालिकाले देशका ७५३ स्थानीय तहमध्ये मुसहर समुदायलाई लक्षित गरी यस्तो कार्यक्रम पहिलोपटक सञ्चालन गरेको दाबी गरेको छ । ‘चौदण्डीगढी नगरपालिकाको सदा समुदायलाई दसैँ खर्च उपलब्ध गराउनेसम्बन्धी कार्यविधि, २०८३’ अनुसार अति विपन्न परिवारलाई चाडपर्व मनाउन सहज होस् भन्ने उद्देश्यले रकम वितरण गरिएको प्रमुख प्रशासकीय अधिकृत रोशनी देवी कार्कीले जानकारी दिनुभयो ।
चौदण्डीगढी नगरपालिका–५ का १०० परिवार, वडा नं ९ का ४४ परिवार र वडा नं १० का २३ परिवारलाई रकम हस्तान्तरण गरिएको हो । वडा नं २ का ६१ मुसहर परिवारलाई रकम उपलब्ध गराइने नगरपालिकाले जनाएको छ । यसअनुसार नगरपालिकाले कूल २२८ परिवारलाई रु छ लाख ८४ हजार वितरण गर्नेछ ।
रकम हस्तान्तरण गर्दै नगरप्रमुख कालुमान लामाले मुसहर समुदायको आर्थिक अवस्था र चाडपर्व मनाउने परिस्थितिलाई ध्यानमा राखेर कार्यक्रम ल्याइएको बताउनुभयो । दसैँ खर्च प्राप्त गरेपछि मुसहर समुदायका सदस्यले खुसी व्यक्त गरेका छन् । कार्यक्रममा सहभागी श्यामकुमारी सदाले नगरपालिकाको सहयोगले आफूहरू निकै हर्षित भएको बताउनुभयो । सरिता सदाले प्राप्त रकमबाट बालबालिकाका लागि दसैँमा नयाँ कपडा किन्ने योजना सुनाउनुभयो ।
नगरपालिकाका सामाजिक शाखा प्रमुख नवराज बरालका अनुसार चौदण्डीगढीमा ५१५ महिला र ५०९ पुरुष गरी कूल एक हजार २४ जना सदा समुदायको जनसङ्ख्या छ ।