काठमाडौँ, ३१ भदौः सांसदहरूले भोटेकोशी बाढीमा बेपत्ता नागरिकको मृत्युदर्ताको कानुनी बाटो खोलिदिएर चलअचल सम्पत्तिको व्यवस्थापन, बीमा, राहतलगायत प्रक्रियामा पीडित परिवारलाई सजीकरण गर्न सरकारको ध्यानाकर्षण गराउनुभएको छ ।
प्रतिनिधिसभाको आजको बैठकको शून्य समयमा उहाँहरूले प्राकृतिक विपत्तिका कारण बेपत्ता नागरिकका परिवारका लागि विशेष कानुनी व्यवस्था गरी मृत्युको कानुनी घोषणा र मृत्यु दर्ता गरिदिएर पीडितलाई राहत दिन सरकारलाई सुझाव दिनुभयो ।
सांसद विश्वराज पोखरेलले भोटेकोशी बाढीपछि फेला परेका शवको पहिचान गर्ने काम द्रुत गतिमा गर्न सुझाव दिँदै पीडित परिवारलाई शिक्षा, स्वास्थ्य र रोजगारीका क्षेत्रमा दीर्घकालीन प्याकेज अविलम्ब घोषणा गर्न माग गर्नुभयो ।
सांसद भरतप्रसाद पराजुलीले भोटेकोशी बाढीमा हराइरहेका नागरिकको परिवारले आशा मारिसकेको अवस्थामा पीडित तत्काल मृत्यु दर्ता गर्न देवानी संहिता तत्काल संशोधन गरेर पीडित परिवारलाई बाटो फुकाइदिन आग्रह गर्नुभयो ।
सांसद रेखाकुमारी यादवले भोटेकोशी बाढीका कारण बेपत्ता भएका नागरिकका परिवारले भोगिरहेका समस्याको कानुनी समाधान खोजिदिन सरकारको ध्यानाकर्षण गराउनुभयो ।
सांसद भीमकुमारी बुढा मगरले भोटेकोशी बाढी प्रभावित महिला तथा बालबालिकाको यथाशीघ्र पहिचान गरी सुरक्षित लैङ्गिक र बालमैत्री आश्रयस्थलको व्यवस्था गर्न माग गर्नुभयो ।
सांसद मनमाया विकले भोटेकोशी बाढीमा बेपत्ता भएका नागरिकको खोजी गर्न र उनीहरूको परिवारलाई राहतसँगै मनोसामाजिक परामर्श दिन माग गर्नुभयो ।
सांसद बलावती शर्माले सर्वसुलभ स्वास्थ्य सेवा प्राप्त गर्ने नागरिकको मौलिक हक कार्यान्वयन गर्न स्वास्थ्य बीमा कार्यक्रमलाई व्यवस्थित बनाउन सरकारको ध्यानाकर्षण गराउनुभयो ।
सांसद वसुमाया तामाङले जापानमा रहेका नेपाली नागरिक आधारभूत सेवा लिन पनि दूतावास धाउन बाध्य भएको जनाउँदै सरकारी सेवा प्राप्तिलाई सहज बनाउन सुझाव दिनुभयो ।
सांसद बुद्धरत्न मानान्धरले ललितपुर निर्वाचन क्षेत्र नं १ का ग्रामीण भेकमा अलपत्र सडक पूर्वाधारको निर्माणमा ध्यान दिन आग्रह गर्नुभयो ।
सांसद बुद्धिप्रसाद पन्तले नागरिकता दुरूपयोग गरेर कम्पनी दर्ता र बैङ्क खाता सञ्चालनमा ल्याएर राजस्व छली गर्ने क्रम बढेको भन्दै वास्तविक दोषीलाई कारबाही र फसाइएका व्यक्तिलाई न्याय दिन माग गर्नुभयो ।
सांसद मञ्जु भुसालले स्वच्छ खानेपानी नागरिकको नैसर्गिक अधिकार भएको जनाउँदै रूपन्देहीको झुम्सा खानेपानी आयोजना तत्काल कार्यान्वयन गर्न सरकारको ध्यानकर्षण गराउनुभयो ।
सांसद मदनकृष्ण श्रेष्ठले मध्यपुर थिमी चोकदेखि मुलपानी र दधिकोटको चारखालसम्मको सडक विस्तारगरी २४ मिटर चौडा बनाउन निर्णयले धेरै नागरिक घरबारविहीन हुने खतरा बढेको भन्दै स्थानीयको आवश्यकता र वास्तविकतालाई ध्यान दिई सडक विस्तारको वैकल्पिक उपाय अपनाउन माग गर्नुभयो ।
सांसद मधुकुमार चौलागाईले खानेपानी योजनाको विद्युत् महसुल घटाउन माग गर्नुभयो ।
सांसद मनिष खनालले संविधान जारी हुँदाका बखत नवलपरासी र रुकुम जिल्ला विभाजन भएको उल्लेख गर्दै संविधान संशोधनका क्रममा नयाँ बनेको दुई जिल्लाका नाम अनुसूचीमा समावेश गर्न ध्यानाकर्षण गराउनुभयो ।
सांसद महेन्द्रबहादुर शाहीले भोटेकोशी महाविपत्तिबाट प्रभावित नागरिकको खोज, उद्धार, राहत र पुनःस्थापनामा देखिएका कमजोरी सच्याउन सुझाव दिनुभयो ।
सांसद मिङ्मा ग्याबु शेर्पाले जलवायु परिवर्तनका कारण हिमाली क्षेत्र प्रताडित हुँदै आइरहेको भन्दै उच्च हिमाली भेकमा रहेका जोखिमयुक्त तालको अध्ययन अनुसन्धान गरी पूर्वसूचना प्रणाली जोड्न माग गर्नुभयो ।
सांसद यज्ञमणि न्यौपानेले राजदूतको कुर्सी खाली राखेर कूटनीतिक सम्बन्ध बलियो नहुने भन्दै अहिलेसम्म राजदूत किन नियुक्ति नगरेको भन्दै सरकारसँग प्रश्न गर्नुभयो ।
सांसद युवराज दुलालले बन्द अवस्थामा रहेको हेटौँडा सिमेन्ट उद्योग तत्काल सञ्चालनमा ल्याउन माग गर्नुभयो ।
सांसद रजनी श्रेष्ठ राष्ट्रिय फुटबल खेलाडी आशिष राईको उपचारका बारेमा आफूले सदनमा आवाज उठाइरहे पनि सरकारले सुनुवाइ नगरेकामा गुनासो व्यक्त गर्दै खेलाडीको दुःखमा राज्य अभिभावक बनेर उभियोस् भनी माग गर्नुभयो ।
सांसद रञ्जु न्यौपानेले देशभर प्रसूति सेवा दिने अस्पतालको पूर्ण ‘अडिट’ गरी आमा सुरक्षा कार्यक्रम विस्तार गर्न सरकारलाई सुझाव दिनुभयो ।
सांसद रमेशकुमार मल्लले लोककल्याणकारी विज्ञापन कटौती गर्ने संशोधित कार्यविधि तत्काल खारेज गरी रकम घटाउने नभई समयानुकूल वृद्धि गर्न माग गर्नुभयो ।
सांसद रमेश प्रसाईँले दैनिक उपभोग्य वस्तुको मूल्यवृद्धि आकाशिदा नागरिकको चुलो बन्द हुने अवस्थामा पुगेको भन्दै कालोबजारी र मूल्यवृद्धि नियन्त्रण गर्न सरकारलाई सुझाव दिनुभयो ।
सांसद राजकिशोर महतोले मधेसका विद्यार्थीका लागि उच्च शिक्षाको केन्द्रका रूपमा रहेको राजर्षी जनक विश्वविद्यालयको पूर्वाधार, जनशक्ति र शैक्षिक क्षमता वृद्धि गर्न सरकारको ध्यानाकर्षण गराउनुभयो ।
सांसद राजन गौतमले नवलपुरको गैँडाकोट र देवचुलीबाट म¬ङ्गलबारदेखि बेपत्ता भएका उत्सव आचार्य, स्वस्तिका गिरी र नम्रता गिरीको तत्काल खोजी गर्न सरकारको ध्यानाकर्षण गराउनुभयो ।
सांसद राधिका रम्तेलले कर्णाली प्रदेशको राजधानी सुर्खेत विमानस्थलको धावन मार्ग विस्तारको काम अलपत्र परिरहेको भन्दै तत्काल उक्त काम अघि बढाउन सरकारसँग माग गर्नुभयो ।
सांसद मोहनलाल आचार्य, यज्ञबहादुर बोगटी, रचना खतिवडा खत्री, रत्नाकुमारी थापा, रविन्द्र पटेल, राजिव खत्री, राजेशकुमार चौधरी, राम लामा, रामविनोद यादव, रिमा विश्वकर्मा, रुकेश रञ्जितलगायतले समसामयिक विषयमा सरकारको ध्यानाकर्षण गराउनुभयो ।