काठमाडौँ, १३ भदौः ‘भू–भाषाशास्त्र प्रवृत्तिः भाषा सम्पर्क, द्वन्द्व, नीति र शैक्षिक अभ्यास’ विषयमा दोस्रो अन्तरराष्ट्रिय सम्मेलन आज काठमाडौँमा सुरु भएको छ ।
नेपाल भू–भाषाशास्त्र समाजले आयोजना गरेको सम्मेलनको उद्दघाटन भाषा आयोगका अध्यक्ष डा गोपाल ठाकुर गर्नुभयो । “यदि मानव यस पृथ्वीबाट लोप हुन चाहन्छ भने, भाषालाई बिर्सनुहोस्, तिनीहरू स्वतः लोप हुनेछन“ डा ठाकुरले भन्नुभयो, “राष्ट्र निर्माणमा मात्र नभई सम्पूर्ण मानव प्रजातीलाई बचाउन पनि भाषाहरूको महत्त्व छ ।”
एमजीआईएमओ विश्वविद्यालय मस्कोका सह–प्राध्यापक डा ग्रिगोरी काजाकोभले नेपाल, जापा र गुआनामा भाषाको सीमान्तीकरणसहित भाषा प्रवद्र्धन र संरक्षणको बारेमा धारणा राख्नुभयो । उहाँ जो प्रतिष्ठित अनुक्रमित रूसी शैक्षिक जर्नल जर्नल अफ पोलिग्लट स्टडीजका कार्यकारी सम्पादक हुनुहुन्छ ।
दाइतो बुन्का विश्वविद्यालयका प्रोफेसर एमेरिटस हिकारु किताबायाशीले नेपालमा बहुभाषिकतालाई जोड दिनुभयो । उहाँ अमेरिकी भू–भाषाशास्त्र समाजका सह–अध्यक्ष र नेपाल भू–भाषाशास्त्र समाजका संरक्षक हुनुहन्छ । उहाँले नेपालसँग भू–भाषाशास्त्र दृष्टिकोणमार्फत भाषिक सद्भाव कायम राख्ने सुनौलो अवसर भएको बताउनुभयो ।
नेपाल भू–भाषाशास्त्र समाजका अध्यक्ष डा आइता विश्वकर्माले देशको राजनीति परिवर्तन हुँदै जाँदा भाषाको संरक्षण र प्रवद्र्धन गर्ने चेतनामा परिवर्तन आएको बताउनुभयो ।
दुई दिने सम्मेलनको क्रममा नेपाल, भारत, जापान, रूस, क्यानडा र अमेरिकाका नौसिखिया अनुसन्धानकर्ता र स्थापित भू–भाषाशास्त्र विद्वान दुवैद्वारा लगभग ३९ अनुसन्धान पत्रहरूले सम्मेलन तालिकामा स्थान पाएका छन् ।
नेपालका एक प्रसिद्ध भाषाविद्, अमृत योन्जन तामाङले नेपालमा भाषा नीतिहरूको विकासमा आफ्नो जीवनको सङ्लग्नता रहेको बताउनुभयो । विश्वभरका विश्वविद्यालयको प्रतिनिधित्व गर्ने अनुसन्धानकर्ता र भाषा अभ्यासकर्ताहरूले धेरै कार्यपत्र पढेपछि अगस्ट ३० मा बहुभाषिकता, शैक्षिक अभ्यास र भू–भाषाविज्ञानसम्बन्धी एक प्यानल छलफलको तालिका तय गरिएको छ ।