बागमती, १३ भदौ : बागमती प्रदेशका मुख्यमन्त्री इन्द्रबहादुर बानियाँले मानव सेवा आश्रमलाई बागमती प्रदेशको सबै जिल्लामा विस्तार गर्न सरकारले पूर्ण सहयोग गर्ने बताउनुभएको छ ।
मानव सेवा आश्रम हेटौँडाको १३औँ वार्षिक साधारणसभालाई आज सम्बोधन गर्दै उहाँले सडक–आश्रित, बेसाहारा तथा असहाय मानवको उद्धार र संरक्षणमा मानव सेवा आश्रमको कार्य उत्कृष्ट रहेकाले यसलाई प्रदेशको १३ वटै जिल्लामा विस्तार गर्न प्रदेश सरकार पूर्णरुपमा सहयोग गर्ने प्रतिबद्धता व्यक्त गर्नुभयो ।
मानव सेवा आश्रमको सेवा सबै जिल्लामा विस्तार गर्ने अभियानमा प्रदेश सरकार साझेदार बन्ने बताउँदै उहाँले आवश्यकता अनुसार मानव सेवा आश्रमको भवन तथा भौतिक संरचना निर्माणका लागि सहयोग गर्न प्रदेश सरकार तत्पर रहेको बताउनुभयो ।
प्रदेशका सबै जिल्लामा सडक आश्रित बेसहारा मानवहरुको व्यवस्थापन गरी बागमती प्रदेशलाई ‘मानवताको प्रदेश’ घोषणा गर्ने प्रदेश सरकारको चाहना रहेको बताउँदै मुख्यमन्त्री बानियाँले समाजलाई कसरी राम्रो बनाउने र टुटेका मनलाई कसरी जोड्ने भन्नेमा सबैले चिन्तन गर्नुपर्ने बताउनुभयो ।