सियोल, १३ जेठ (रासस/एएफपी) :  निर्वाचन हुन एक हप्ताभन्दा कम समय बाँकी रहँदा मङ्गलबार जारी गरिएको ग्यालप सर्वेक्षणले दक्षिण कोरियाका विपक्षी नेता ली जे–म्युङ देशको अर्को राष्ट्रपति बन्ने दौडमा स्पष्ट अग्रस्थानमा रहको देखाएको छ ।     
     
 दक्षिण कोरियालीहरूले जुन ३ मा मतदान गर्नेछन् । निर्वाचनले पूर्व नेता युन सुक योलले डिसेम्बरमा नागरिक शासन निलम्बन गर्ने असफल प्रयासले सुरु गरेको महिनौँको राजनीतिक उथलपुथललाई टुङ्ग्याउनेछ ।     
     
 ग्यालपले डेमोक्रेटिक पार्टीका नेता लीलाई स्पष्ट अग्रस्थानमा राखेको छ । ४९ प्रतिशत उत्तरदाताले उहाँलाई सर्वोत्तम उम्मेदवारका रूपमा हेरेको बताएका छन् ।     
     
 सत्तारुढ पिपुल पावर पार्टीका पूर्व श्रममन्त्री किम मुन–सू ३५ प्रतिशत मतका साथ पछाडि हुनुहुन्छ ।     
     
 दक्षिण कोरियाली युवाहरूलाई लक्षित गरेर चुनावी अभियान चलाइरहेको रिफर्म पार्टीका ली जुन–सिओक ११ प्रतिशत मतसहित तेस्रो स्थानमा हुनुहुन्छ ।     
     
 ग्यालप कोरियाद्वारा फोनमार्फत सञ्चालित यो सर्वेक्षणले सप्ताहन्तमा एक हजार चार उत्तरदाताको सर्वेक्षण गरेको थियो, जसमा तीन दशमलव एक प्रतिशत अङ्कको त्रुटि सीमा रहेको बताइएको छ ।     
     
 सर्वेक्षणले राजधानी सियोल, इन्चियन र ग्योङ्गीका सबैभन्दा बढी जनसङ्ख्या भएका क्षेत्रहरू सुरक्षित गर्दै डेमोक्रेटिक पार्टीका नेताले लगभग सम्पूर्ण देशमा सहजै जित हासिल गर्ने सुझाव दिएको छ ।     
     
 तेस्रो स्थानमा रहेका ली जुन–सिओकले वामपन्थी ली जे–म्युङलाई जित्नबाट रोक्नका लागि आफ्नो राष्ट्रपतीय उम्मेदवारी त्याग्न कन्जरभेटिभहरूको बढ्दो दबाबको सामना गर्नु परेको छ ।     
     
 तर निर्वाचनको दिन मतपत्रमा आफ्नो नाम ‘स्पष्ट रूपमा देखिने’ भएको घोषणा गर्दै ४० वर्षीय उहाँ दृढ हुनुहुन्छ ।     
     
 मङ्गलबारको सर्वेक्षणले ली जे–म्युङले एकीकृत कन्जर्भेटिभ उम्मेद्वारको सामना गरे पनि जित्ने सङ्केत गरेको छ ।     
     
 सर्वेक्षणमा सहभागी करिब पाँच प्रतिशतले आफूसँग कुनै प्राथमिकता नभएको वा सबैभन्दा राम्रो उम्मेदवार को हुनेछ भन्ने थाहा नभएको बताएका छन् ।     
     
 यो सर्वेक्षण अर्को सप्ताहको मतदानअघि जारी गरिने अन्तिम सर्वेक्षणहरूमध्ये एक हो, किनभने त्यसपछि सर्वेक्षण प्रकाशन गर्न प्रतिबन्ध छ ।     
     
 कन्जरभेटिभ उम्मेद्वार किमले युनको मार्सल कानूनको पराजयपछि जनताको ध्यान खिच्नुभएको थियो, जब उहाँले नागरिक शासनको निलम्बन रोक्न असफल भएकोमा जनतासँग माफी माग्न अस्वीकार गर्नुभयो ।     
     
 हप्तौँसम्म ली जे–म्युङभन्दा पछि परेपछि उहाँ बिस्तारै नजिक आइरहनुभएको छ ।     
     
 नेक्स्ट रिसर्चले सोमबार जारी गरेको एक सर्वेक्षणले दुई उम्मेद्वारबीचको अन्तर राष्ट्रव्यापी नौ प्रतिशत विन्दुमा सङ्कुचित भएको र सियोलमा मात्र तीन दशमलव दुई अङ्कमा झरेको देखाएको छ ।     
     
 ली सन् २०२२ को राष्ट्रपति चुनावमा युनसँग देशको इतिहासमा कुनै पनि मतको सबैभन्दा सानो अन्तरले पराजित हुनुभएको थियो ।